Rina Balaj ka folur për raportin e saj me reperin Fero, një lidhje artistike që ka nisur që në fillimet e karrierës së tyre. E ftuar në emisionin “Ora Shtatë” në Klan Kosova, këngëtarja theksoi se respekti dhe afërsia mes tyre kanë mbetur të forta, pavarësisht ndryshimeve në karrierë dhe jetën personale.
“Unë me Feron mund të them lirisht se jemi rritur bashkë. Kemi qenë shumë të rinj kur kemi filluar të punojmë. Me mua ka qenë gjithmonë shumë i sjellshëm, dhe jo vetëm me mua, por edhe me shoqërinë time që janë krejt vajza,” – tha Rina.
Ajo shtoi se mbështetja reciproke ka qenë një shtyllë e rëndësishme e raportit të tyre artistik.
“Shumë shpesh kemi marrë këshilla nga njëri-tjetri gjatë këtyre viteve. Edhe pse nuk kemi qenë në të njëjtin label, kemi vazhduar të ruajmë një raport shumë të mirë. Unë Feron e shoh si vëllan tim, si Rigonin,” – u shpreh ajo, duke përdorur emrin e vërtetë të reperit.
Kur u pyet për procesin gjyqësor ndaj Feros, i cili akuzohet nga ish-bashkëshortja Arbenita Ismajli për dhunë në familje, Rina zgjodhi të mos komentojë duke theksuar se nuk mund të gjykojë për diçka që nuk e ka parë vetë.
“Nuk mund të gjykoj për diçka që nuk e kam parë vetë,” – tha ajo.
