Është rikthyer! Kim Kardashian rishfaqet në publik dy muaj pasi solli në jetë fëmijën e saj të dytë, djalin e pagëzuar me emrin Saint. E veshur e gjitha në të zeze, me një pallto hedhur sipër krahëve dhe me dorën gjithmonë mbi bark. Bashkë me të, vajza e madhe North dy vjeçe e gjysëm dhe bashkëshorti Kanye West. Familja fluturoi në New York për një rast të veçantë: sfilatën e veshjes nën markën e reperit, në javën e modës në metropol. Pasditen e 11 shkurtit në Madison Square mbretëresha e reality-t do të bëjë edhe daljen e parë zyrtare si nënë e dy fëmijëve. Saint erdhi në jetë në ditët e parë të dhjetorit dhe prej atëherë Kim nuk është parë më, ashtu siç veproi edhe pas lindjes së parë. Thashethemet flasin për një izolim të bukuroshes në mënyrë që të rikthehet në formë. Mirëpo ajo e mohon. “Nuk e kam izoluar veten që të mbaja dietë, thjesht kam kaluar kohën në shtëpi me familjen time. Kam shkuar në park, dhe në kopshtet e shtëpive të miqve. Sepse atje nuk më fotografojnë”, ka thënë Kim. Më herët ajo kishte njoftuar fansat e saj për humbjen në peshë duke shkruar në rrjetet sociale: Jam kaq e emocionuar! Deri më sot kam humbur 14 kilogramë por duhet të humbas edhe 17 të tjera. Jam shumë e përqendruar.
