Ditën e djeshme një grup aktorësh kanë dalë në protestë për të kundërshtuar një projekt-ligj të Ministrisë së Kulturës.
Protestës ju bashkangjit edhe aktori i madh Robert Ndrenika, i cili ka thënë se teatri po vidhet, ndërkohë që ai është pronë e artistëve dhe askush nuk duhet të largohet që andej.
“Plot shumë vite më parë edhe PPSH thoshte do bëjmë një teatër, por ky teatër nuk u bë. Edhe këto 27 vjet është folur se do të bëhet një teatër, por nuk ka patur pikë transparencë. Ajo që di unë është se prona e jonë, Teatri aktual, është një sipërfaqe 6-7 mijë metra katror, i cili është vjedhur dhe po vidhet sheshit, në mënyrë të hapur.
I thashë dikujt shiko çfarë xhamie është bërë, dhe më tha se atë po e bën Erdogani. Shumë mirë, sepse teatri duhet ta bëjë shteti shqiptar, sepse teatri është kisha dhe xhamia e shqiptarëve.
Vajtëm dhe pamë atë godinën te turbina. Ajo godinë është vetëm për fushatë elektorale, por jo për teatër. Ajo fjala që i kam thënë ministreshës se unë do shtrihem te turbina dhe ajo që e ktheu me ironi po le të vijë të aktrojë në skenë, duket se ka qenë një fjalë me mend.
Ne nuk do të lejojmë që të prishet Teatri, ndërsa për TOB-in të mos guxohet t’i qaset. Dhe një gjë, mos kini shumë shpresë te këto analistët e mëdhenj që dalin në televizione, sepse para 20 vitesh ato u bënë me atë ministren e asaj kohe. Kur i kërkova ministreshës të na jepte ca para për lapidarin e Spahivoglit, nuk më dha as 5 lekë për këtë lapidar. Kam edhe të tjera për të thënë, por tani nuk më kujtohen, pasi më vijnë kur jam në krevat, në ëndërr.
Edhe një gjë! Kemi aktorë të mrekullueshëm dhe paguhen për një kafshatë bukë. Kur të vënë litarin e bukës, ai është më i tmerrshmi nga të gjitha”, tha Ndrenika.
