Rikthimet televizive mes ish-partnerëve rrallëherë sjellin surpriza të mëdha, por Nora Istrefi dhe Robert Berisha sapo përjetuan një moment që askush nuk e kishte parë të vinte. E ftuar në programin e Robertit, “Robi plaket kur don vet”, këngëtarja u bë pjesë e një situate që nga promo-ja dukej si një lojë televizive… derisa u shndërrua në një gjest shumë më personal.
Teksa biseda po rridhte normalisht, Roberti nxori një kuti të vogël nga xhepi dhe në vend të një shakaje siç pritën shumë, ai zbuloi kuptimin e vërtetë të dhuratës:
“Kam një dhuratë për Norën, për të cilën kam kursyer gjatë për ta blerë, është një unazë me diamantë. Kisha qejf që kur Reneeja jonë të bëhet 18 vjeç [ta marrë]. Këtë e mban ti derisa Renee të bëjë 18 vjeç.”
Nora e mori me një buzëqeshje të ngrohtë dhe, mes emocionit, provoi unazat në gisht, por pa e humbur sensin e humorit. Ajo u përgjigj:
“Ka për t’u gëzuar Renne për këto unaza shumë të bukura. Dhe unë po ia përdor pak,” tha me të qeshur.
Pavarësisht se marrëdhënia e tyre përfundoi në vitin 2019 pas një historie 14-vjeçare, të dy mbeten të lidhur përmes vajzës së tyre, Renee. E pikërisht për të, duket se Roberti ka ruajtur këtë simbol të vogël, një unazë që bart më shumë se një diamant: bart nostalgjinë, respektin dhe një premtim për të ardhmen e së bijës.
Një moment i rrallë, i butë, dhe… le të themi, diçka që vetëm Nora dhe Roberti dinë ta bëjnë kaq natyrshëm.
