Ka role që nuk kërkojnë skenë, dritë apo tekst. Mjafton një moment. Një frymëmarrje. Një krah që mban një jetë të re.
Kështu, pa bujë dhe pa njoftim zyrtar, Romeo Veshaj ndau me publikun një nga ato çaste që flasin vetë.
Në një story të thjeshtë, me mbishkrimin “My Sunday”, Romeo shfaqet duke mbajtur në krah mbesën e tij, në një qetësi që rrallë e shohim te figurat publike. As humor, as ironi, as rol. Vetëm prani. Dhe ndoshta për këtë arsye, momenti preku më shumë se çdo deklaratë.
Anëtarja më e re që i është shtuar familjes Veshaj, Bluem, duket se ka sjellë lumturi të madhe jo vetëm për ta, por edhe për publikun që i ndjek prej vitesh. Pak kohë më parë, aktori e kishte paralajmëruar ardhjen e vogëlushes me humorin që e karakterizon, duke shkruar se vajza e vëllait të vogël, Mario, “tashmë ka dy bodyguardë, dy xhaxhallarë”. Ndërkohë që videoja e fundit e zhvesh nga shakaja dhe gjithçka, duke e lënë ndjesinë të flasë vetë.
Romeo Veshaj, i njohur për energjinë, ritmin dhe skenën, shfaqet këtu në një dimension tjetër. Më i heshtur, më i ngadaltë, më njerëzor. Një rol që nuk duartrokitet, por mbahet mend.
Sepse ndonjëherë, titujt më të bukur nuk shkruhen për premierat por për ato të Diela që nuk përsëriten.
