Roza Lati ka qenë e ftuara e radhës në ‘Vizioni i Pasdites’ ku ka rrëfyer detaje për jetën dhe karrierën. Këtë herë ajo preku edhe një temë të veçantë, e cila disa kohë më parë mori shumë vëmendje në media.
Roza publikoi një foto nga një studio muzikore dhe aq mjaftoi për të shkaktuar zhurmë. Sot, përballë Evi Reçit ajo ka treguar detajet që fshihen pas fotos.
“Të bërit këngë është një dëshirë e nënës time për mua. Unë nuk jam nga ato që kapin notat e larta, por jam e intonuar. Kur publikova foton në ‘Instagram’ kam pyetur ndjekësit nëse duhet ta bëj një këngë apo jo. Shkova tek ‘On Off records’ që ka Arben Skënderi dhe nga aty bëra foto. Katalizator i të gjithë kësaj nisme është kompozitorja e parë shqiptare femër, Diana Ziu. Ajo ka takuar mamanë time në xhirime dhe kur më njohu mua më tha që i kujtoj veten në rini, prandaj më tregoi se ka një këngë për mua. Kjo këngë nuk është realizuar ende, por besoj se do jetë në ritmet ‘jazz’. Më pëlqen shumë kjo rrymë”,-rrefeu Roza.
Moderatorja e njohur nuk i shpëtoi as pyetjeve ‘ngacmuese’ për faktin që muzika ‘hip-hop’ është e preferuara e saj dhe mbase mund të realizojë në të ardhmen këngë për t’i bërë ‘diss-in’ kolegeve. “Jo, nuk më pëlqejnë këto gjëra, ndërsa hip-hopin dua ta dëgjoj vetëm në makinë”,-tregoi më tej Lati.
Roza ka theksuar në përfundim të intervistës se nuk synon të hyjë në tregun muzikor me këtë këngë, por është diçka që dëshiron ta bëjë për kënaqësinë e saj. / revistawho.com
