Rrëfehet “Bujari tek Zonja nga qyteti”: Rajmonda u emocionua kur më pa, na dolën fjalë

E kujt nuk i kujtohet skena e famshme tek “Teto Ollga” kur “pretendenti” i Melit hodhi letrën me gur nga poshtë dritares. “Epo domosdo, e hodhi letrën jarani edhe iku. Po ‘B’ e ka emrin apo ia kanë ngrënë pulat?!” Me gjithë letrat që çoi e mori Ollga për të rregulluar Melin me një burrë në qytet, ajo e B-­së i prishi të gjitha planet. “Të prita, po ti ishe me shoqet te Vali. Në dhomë nuk vij dot, se është teto Ollga. Takohemi nesër. B.”. Protagonisti i një prej realizimeve kinematografike më të dashura për shqiptarët, aktori Piro Kita ka bërë një rrëfim të gjatë për gazetën Panorama. Ai kujton çdo detaj e përjetim, që nga kinoprova për të marrë rolin e Bujarit në film, tek prezantimi për herë të parë me të bukurën Rajmonda Bulku. “Në fakt, kur kam bërë kinoprovën ajo nuk ka qenë, pra e kam takuar kur jemi mbledhur për të xhiruar. Siç më ka thënë kohë më vonë, ajo ishte e emocionuar për të parë se kush do të ishte partneri i saj në film. Kishte dëgjuar sigurisht për emrin, e që sapo isha diplomuar, por nuk njiheshim. Ishte ulur me të tjerë në tavolinë, kur unë iu afrova për herë të parë. Ngaqë kishte pyetur aq shpesh, kush është, kush është, të pranishmit, sapo më kishin parë i kishin thënë, ja, ja ku është, po vjen. Nga hutimi ajo ishte ngritur për të më parë e kishte rrëzuar brokën e ujit nga tryeza. Pa dyshim ishte shumë e bukur dhe kjo dukej menjëherë, nuk mund ta mohonte askush. Të them të drejtën nuk ishte një gjë që mund ta kaloje pa e vënë re, pa dyshim që shëtisnin në kokë edhe mendime të tjera, jashtë bashkëpunimit profesional”, tregon ai. Mirëpo përtej dëshirës së pashprehur e dyshimeve të të gjithëve, midis dy aktorëve të rinj nuk pati asgjë më shumë se puna. “Megjithëse zhurma u bë e madhe, jo, nuk pati asgjë. Më kujtohet si tani kur u shfaq filmi “Zonja nga qyteti” për herë të parë. Ka qenë ditë e hënë, mëngjes, ora 09:00, kur filloi filmi dhe të pranishmit, që ishin rrethi artistik e njerëzit e letrave të kohës, kanë dalë nga kinemaja rreth orës 11:00. Të gjithë që dolën më drejtonin gishtin, edhe spektatori i ditëve të mëpasshme po njësoj. Ishin të bindur se unë dhe Monda ishim të fejuar vërtet. Po në këtë kohë, prej fjalëve që ishin hapur, im vëlla që ishte përfaqësues i ambasadës sonë në Itali, më telefonon i nervozuar, pse nuk e kisha njoftuar se isha fejuar. Si kisha mundur t’ia mbaja të fshehtë! Atij i kishin shkuar njerëz për urim meqenëse sipas tyre, pas pak kohësh, ne do të martoheshim”, thotë ndër të tjera aktori Piro Kita.