Në një takim me gjimnazistë në New Hampshire, aktorja me origjinë shqiptare, Eliza Dushku rrëfeu për të shkuarën kur konsumonte drogë dhe alkol. “Më pëlqente droga, e doja derisa u bë e padëshiruar. Droga nuk më donte mua. As familjen time. As miqtë e mi që vdiqën prej saj”, -tha Eliza. Aktorja përmendi gjithashtu se hoqi dorë për familjen e saj, jo për veten. “Mbaj mend vëllain tim që nuk donte t’i afrohesha mbesës sime. Ai nuk kishte besim tek unë. Unë jam hallë e mirë sot, por ai kishte të drejtë. Unë jam njeri i mirë, por droga më bënte të merrja vendime të gabuara.”, -vazhdoi Eliza. Dushku e mbylli fjalimin duke treguar se po realizonte ëndrrën e saj duke shkuar në universitet në moshën 36 vjeçare dhe e inkurajoi audiencën mos të humbin shpresën nëse po përballen me probleme. “Hoqa dorë nga droga për familjen, por sot jam esëll për veten dhe për ju. Sepse droga dhe alkoli janë të fuqishme, por ne jemi akoma më të fuqishëm”, -përfundoi aktorja./revistawho.com
