Një nga zërat më të mirë shqiptar, këngëtarja Liljana Kondakçi e rrëfen jetën e saj si një gëzim të vazhdueshëm. Megjithë çastet e vështira e humbjet e mëdha si ajo e bashkëshortit apo e nënës, Liljana shikon përpara me optimizëm e ndihet shumë e re. Për këtë e ka ndihmuar kënga, tregon ajo në një intervistë për gazetën “Paloma. “Unë jetën time e kam pasur të mrekullueshme, pa probleme, pa trishtime, por si çdo familje tjetër edhe unë i kam kaluar ngjarjet e hidhura. Por jeta i ka këto dhe unë gjej forca tek fëmijët e mi dhe profesioni im për t’u çliruar nga çdo trishtim. Pak a shumë jeta ime ka qenë prej një “Lolite”. Kam pasur fatin që te prindërit e mi kam gjetur mbështetje për profesionin tim. Kjo mbështetje ka qenë e njëjtë në intensitet edhe te familja e bashkëshortit tim, kjo edhe falë faktit se ai ka qenë muzikant. Vetëm nuk çan dot, kësisoj fati dhe familja kanë qenë në të njëjtën rrugë me mua”, ka rrëfyer Kondakçi.
