Për tre vite me radhë ajo ishte një nga fytyrat (dhe trupat) më të njohur të Victoria’s secret, marka e famshme për të brendshmet dhe për sfilatat spektakolare me supermodelet. Amerikane, lindur në vitin 1989, Erin Heatherton ka qenë ndër modelet më të njohura të markës, derisa në vitin 2013 vendosi të dilte nga petku i “engëllit”. Arsyeja? Presioni i vazhdueshëm për të humbur në peshë, siç ka treguar vetë ajo në një intervistë për revistën “Time”. “Në dy sfilatat e mia të fundit, m’u tha që duhet të humbja peshë. Mendova, vërtetë e kanë?”, ka thënë modelja. Heatherton ka nënvizuar se në fillim punoi fort për të kënaqur njerëzit për të cilët punonte, duke u ushqyer në mënyrë të shëndetshme dhe duke u stërvitur 2 herë në ditë. Mirëpo teksa përgatitej për sfilatën e saj të fundit të Victoria’s Secret në vitin 2013, u ndje sikur trupi nuk po i përgjigjej më. “Isha vërtetë shumë në depresion sepse stërvitesha fort por ndjeja se trupi më bënte rezistencë, më kujtohet që një natë pasi u ktheva në shtëpi nga stërvitja, duke parë ushqimet mendova se nuk duhet të haja”, ka thënë Erin. Pak pas asaj sfilate, ajo braktisi përgjithmonë markën e famshme, dhe nisi të kujdesej për nevojat e trupit. “Kuptova që nuk mund të shfaqja më trupin tim, veten time, përpara gjithë atyre grave që më shihnin dhe t’i thoja se është e lehtë të kesh këtë trup, e mund ta arrijë kushdo”, tha modelja.
