Si rrallëherë aktori i suksesshëm i filmit dhe teatrit shqiptar Ndriçim Xhepa, ka pranuar të rrëfejë jetën dhe karrierën në një studio televizive. I ftuar në programin e Arian Çanit, Xhepa i cili sapo ka mbushur 60 vjeç, tregoi për fëmijërinë, rolet, familjen por edhe për puthjet. “Zonë e lirë” kishte përgatitur një material përmbledhës me disa prej skenave me puthje në buzë të aktorit. Xhepa tha se nuk janë puthur aktorët por rolet. “Në këtë profesion nuk puthen koleget, puthen rolet. Në puthjet e mia janë kolege që kam punuar prej një jete. Të gjitha pamjet me puthje janë të pas 90′. Para 90′ nuk lejohej, se aktorët po ato janë. Edhe sot ka aktorë të rinj të talentuar që nuk e kanë probleme këtë. Po edhe sot ekziston një lloj mentalieteti, diku i dashuri, komshiu, babai. Por puthja në rol është një copëz e rëndësishme në kompletimin e figurës që të çon drejt vërtetësisë. Aktorët e rinj as nuk duhet ta çojnë nëpër mendje këtë punë. Në momentin që nuk e bëjnë se mendojnë që bëhen me turp, unë them se është e kundërta. Bëhen me turp nëse nuk e bëjnë. Ose të mos pretendojnë të marrin role kryesore”, tha ai. Pyetjes së Çanit nëse e shoqja bëhet xheloze për këto skena, artisti iu përgjigj: “Kam një bashkëshorte që nuk është xheloze madje ka dëshirë që të jem në një punë të re, në një rol të ri”./ revistawho.com
