Një detaj i papritur ka tërhequr vëmendjen globale pas publikimit të imazheve të presidentit të Venezuelës, Nicolás Maduro. Fotografia ku ai shfaqet i veshur me një kostum sportiv gri u përhap me shpejtësi në rrjetet sociale dhe shkaktoi një reagim zinxhir që pak kush e kishte parashikuar.
Bëhet fjalë për një tuta sportive të markës Nike, e cila menjëherë pas daljes së fotos u kërkua masivisht nga përdorues në mbarë botën. Brenda pak orësh, modeli u shit plotësisht në disa platforma online, pa asnjë fushatë reklamimi apo promovimi nga kompania.
Interesi për këtë veshje u rrit ndjeshëm pas publikimit të imazhit, ku Maduro shfaqej i shoqëruar nga autoritetet amerikane pas një operacioni të urdhëruar nga presidenti i SHBA-së, Donald Trump. Ndërsa ngjarja politike pushtoi titujt ndërkombëtarë, rrjetet sociale reaguan në mënyrën e tyre, duke e kthyer një element të thjeshtë veshjeje në një objekt dëshire.
Në disa vende, çmimi i kostumit sportiv varion nga 60 deri në 90 euro, duke e bërë atë relativisht të përballueshëm krahasuar me veshjet luksoze të figurave publike. Edhe pse modeli gri është zhdukur nga raftet, variantet në ngjyra të tjera vazhdojnë të jenë të disponueshme.
