Futbollisti i Kombëtares shqiptare, Rey Manaj, në një intervistë ekskluzive për emisionin “Opinion” në Tv Klan, ndau disa momente të rëndësishme nga jeta dhe karriera e tij.
Ai tregoi se një nga gjërat më të rëndësishme që bëri pasi mori rrogën e parë si profesionist ishte të ndihmonte familjen. “Kur mora rrogën e parë në moshën 16-vjeçare, vendosa që mamaja ime të mos punonte më. I thashë që nuk kishte më nevojë të lodhej,” u shpreh Manaj. Ai zbuloi gjithashtu se paga e tij e parë ishte 6 mijë euro në muaj.
Më tej, Manaj foli për rrugëtimin e tij në futboll, duke përmendur eksperiencat në klubet e Serisë A, si dhe periudhat tek Interi dhe Barcelona.
“Jam shumë i lumtur që gjithçka shkoi mirë në eliminatoret me Shqipërinë. Goli kundër Serbisë ishte i rëndësishëm, por mbi të gjitha më gëzoi fakti që morëm tre pikët,” tha ai.
Ai kujtoi edhe fillimet e tij: “Kam nisur të luaj futboll që në moshën 6-vjeçare. Kur isha 3 vjeç, u largova me familjen drejt Italisë me gomone. Më pas na kthyen me avion dhe jetonim tek shtëpia e tezes.”
