Ditët e fundit vendi ynë është përballur me masa ekstreme, për shkak të Koronavirusit. Është mjaft e rëndësishme që të gjithë të qëndrojnë në shtëpi, megjithatë ka dhe nga ata që pyesin shpesh sa do të zgjasë kjo situatë. Në një lidhje ‘live’ me ndjekësit, Kryeministri i Shqipërisë, Edi Rama, i është përgjigjur kësaj pyetje duke i kërkuar të gjithëve t’i shohin pozitivisht këto masa
“Shumëkush shqetësohet deri kur do të vazhdojmë t’u nënshtrohemi masave apo për qarkullimin me makinë, por këtë nuk e dimë dhe askush askund në botë nuk e di. Sa më shumë të shtrëngohemi sot aq më shpejt do ta luftojmë këtë armik.
Kjo do të jetë jeta jonë në periudhën që kemi përpara, asgjë tjetër s’mund të bëjmë e s’na falet të bëjmë në këtë të keqe të madhe. Të nxjerrim më të mirën nga vetja duke ndihmuar njëri-tjetrin si individ dhe vendin. Të gjejmë të mirat duke rilidhur shumë fije të këputura vëmendjeje me fëmijët dhe prindërit. Çfarëdo çmimi do të duhet t’i paguajmë kësaj lufte, kini besim se më të mirë dhe më të fort do të dalim prej saj si njerëz dhe si vend. Shqipëria nuk do të gjunjëzohet dhe më e mira është ende për të ardhur”, u shpreh ai. E gjitha kjo po bëhet që vendi ynë ta kalojë sa më shpejt dhe sa më mirë këtë moment të vështirë.
