Ata kanë dalë jashtë kuadratit të ekranit, ku njerëzit janë mësuar t’i shohin çdo të dielë mbrëma. Kanë marrë rrugët në një turravrap të paparë, për të shkuar në çdo qytet të Shqipërisë, për të ndaluar në çdo shesh, e për të çuar mes njerëzve gëzimin e të qeshurat, që vetëm ata dinë t’i ndjellin.
Një “Verë me Portokalle” është gjëja më e bukur që mund të ndodhë në këto ditë të nxehta vere, sidomos në qytezat e vogla, ku rrallë ndodhin gjëra të mëdha.
Ndaj dhe Vodafone Albania u bë mbështetësi kryesor i kësaj nisme, që pa diskutim do të shijohet nga të gjithë, live, duke pasur mundësinë e takimit me aktorët më të dashur të humorit në Shqipëri, me Policin, Melamin Beratin, Gagaçin, Betim Spërdhimën, Bukrën, Luzen, Ramadan Kafshën, Kapo Kapllanin, Drejtorin, Çiftin e lumtur apo dhe moderatorët, Salsano Rrapin e Xhemi Shehun…E sigurt se pas takimit me ta, të gjithë do të thonë- “Oh sa jam kënaq! Sa kam qesh!”
Bëhet fjalë për një tur shfaqjesh, të trupës së njohur të “Portokallisë”, të konceptuar disi ndryshe nga çfarë jemi mësuar t’i shohim në ekran. Janë po të njëjtët aktorë, por me numra të rinj humori, të përshtatur për skenat e mëdha të shesheve, me më shumë elemente spektakli, ku nuk do të mungojnë këngët e kërcimet nga vetë aktorët.
Turi i nisur më 28 qershor në Berat, vijoi një ditë më pas në Rrogozhinë, ku trupa ndjeu edhe një herë më shumë etjen që kanë, sidomos banorët e qyteteve të vogla për të tilla shfaqje që do të vijojnë në ditët në vazhdim edhe në shumë e shumë qytete të tjera.
Më 1 korrik “Verë dhe Portokalle 3” do të mbërrijë në sheshin e Katedrales në Korçë, një ditë më pas, më 2 korrik aktorët do të shfaqen në sheshin “Rilindja” në Ersekë, për të shkuar mandej më 4 e 5 korrik në Lushnjë e Divjakë. Sheshi “Pavarësia” në Vlorë do të jetë ndalesa e 9 korrikut, e prej andej do të shkojnë në Sarandë (11 korrik). Sigurisht që destinacionet nuk do të jenë vetëm në jug të Shqipërisë. Pas Fierit e Durrësit (në datat 14 e 15 korrik) trupa do të ndalojë në Tiranë në Sheshin Skënderbej (më 17 korrik) për të vijuar një ditë më pas në Bulqizë e më pas (19 korrik) në Krujë. Pas datës 21 korrik, “Verë dhe Portokalle 3” do të mbërrijë në Shkodër, në sheshin para Bashkisë (21 korrik), në Dibër, Mirditë (25- 26 korrik) e më pas në 1 gusht në Malësinë e Madhe, në sheshin Tamarë Kelmend, ku do të shënohet dhe shfaqja e fundit e kësaj vere që pavarësisht temperaturave të çmendura do të jetë e qeshur.
