Njeriu vuan për dashurinë kur është i ri, e kjo ndjesi shoqërohet me trishtim, iluzion, me ëndrrën e me projeksionet që krijon shpirti. E keni lexuar “Eugen Onegin”? Epo merrni frymë thellë të lexoni çfarë ka ndodhur në Itali.
Në sallën e TKOB në Palermo është rikthyer pas 24 vjetësh vepra e famshme e repertorit rus “Eugene Onegin” . Një kast i shkëlqyer sopranosh dhe tenorësh kanë çelur siparin e e natës së parë të veprës ruse në shtëpinë e artit “Massimo Vittorio Emanuele”. Njëri prej artistëve është edhe tenori i shkëlqyer shqiptar, Saimir Pirgu. Ai mban një prej roleve kryesore, atë të romantikut Vladimir Lenskij, një rol unik që përçoi emocione të forta te publiku italian.
Interpretimi magjepsës i Saimir Pirgut, me diksionin elegant dhe potencën është shoqëruar me ovacione dhe duartrokitja ka zgjatur jo pak, por 15 minuta. Ashtu siç e ka thënë edhe kritika e “The New York Sun”, “Qielli është limiti i tij”, ndaj krenaria për zërin magjepsës të Saimir Pirgut është e madhe. Interpretues i madh i Çajkovskit është drejtuesi Omer Meir Wellber, i cili edhe këtë herë nuk zhgënjeu.
Një emocion që mbajti mbërthyer artdashësit për 190 minuta krijon kujtime të përjetshme, nga ato të papërsëritshmet.
Një hero egoist që shkon drejt një dueli fatal me mikun e tij më të mirë krijon dimensione mahnitëse në skenën e teatrit. Kjo vepër është shfaqur për herë të parë në Moskë, më 29 mars 1870, teksa në skenën e teatrit Operas dhe Baletit në Palermo do të shfaqet në datat 20 deri më 25 maj 2023.
