Shumë vite më parë puna për një këngëtar mund të themi se ishte disi më e lehtë. Mjaftonte zëri dhe një veshje e thjeshtë për të realizuar një videoklip. Por sot çdo gjë ka ndryshuar dhe evoluar. Përveç zërit, efektet vizuale dhe paraqitja e artistit janë diçka shumë thelbësore. Për të arritur rezultatin e dëshiruar që publiku ta presë sa më mirë, shpeshherë artistëve u duhet të bëjnë disa sakrifica.
E njëjta gjë ka ndodhur me xhirimet fundit të klipit të Ronela Hajatit, që pritet të dalë shumë shpejt. Në këngën e saj më të re, Ronela ka treguar se kanë punuar 60 persona për ta sjellë në formën e duhur. Por realizimi i klipit nuk ka qenë aspak i lehtë për këngëtaren.
Përveçse i është dashur që të xhirojë me orare shumë të zgjatura, i është dashur të mbajë veshur edhe diçka jo shumë komode. Në një sekuencë të videoklipit Ronela mban në kokë dy brirë që i japin pamjen e një sundueseje. Këta brirë e kanë munduar kaq shumë Ronelën sa i ka cilësuar si dhimbja më e madhe që ka përjetuar në jetë.
“Nëse kam ndjerë ndonjëherë dhimbje në jetën time, janë këta brirë…kështu ju lutem mos më flisni më për ta…koka ime dhemb ende”, – ka shkruar Ronela. Por pasi mbaron çdo gjë dhe publiku i mirëpret projektet, me siguri një artist harron çdo sakrificë dhe merr gjithë kënaqësinë prej tij. /revistawho.com
