Erjona Kakeli përveçse është një aktore shumë e njohur, është dhe një bashkëshorte shumë e përkushtuar për fëmijët dhe bashkëshortin e saj, Salsano Rrapin. Ditën e sotme ajo ishte e ftuar në emisionin “Rudina”, por këtë herë jo me bashkëshortin, por me motrën e saj Mikelën. Edhe Mikela është personazh i njohur për publikun shqiptar, sepse ka qenë pjesëmarrëse në ‘Big Brother 7’.
Dy motrat të ftuara në emision folën jo vetëm për karrierën e tyre, por edhe jetën private dhe lidhjen e ngushtë që kanë me njëra-tjetrën. Gjatë emisionit për Erjonën dhe Mikelën ishte rezervuar një surprizë mjaft e këndshme që i emocionoi të dyja. Salsano Rrapi me anë të një videomesazhi të mbushur me nota humori tregoi për lidhjen që ka jo vetëm me bashkëshorten, por edhe me kunatën e tij.
“Dua të kërkoj ndjesë për ndonjë gabim që mund të bëj Erjona. Tani jam futur në kurs. Pa merak e kam bërë edhe pazarin”, – tha duke qeshur Salsano. Por ai nuk mund të mos fliste dy fjalë edhe për kunatën: “Mikela është një dhe e vetme në këtë botë. Rrallëherë takon njerëz të tillë në jetë. Të dua shumë si shoqe dhe si kunatë”. Të dyja motrat mbetën të surprizuara nga fjalët e Salsanos, madje Erjona u emocionua aq shumë sa nuk mundi të mbante dhe lotët. /revistawho.com
