Sara Karaj ka ndarë sot me ndjekësit një lajm që shënon një moment historik për industrinë shqiptare të bukurisë. Me një postim të ndjerë në rrjetet sociale, ajo ka bërë të ditur se SKosmetics dhe SelfSKN janë brandet e para shqiptare të kozmetikës që futen në rrjetin ndërkombëtar Lagardère Travel Retail, një nga më të mëdhenjtë globalisht në aeroportet dhe pikat premium të udhëtimit.
“Sot nis një kapitull i ri për mua dhe për të gjithë industrinë shqiptare të bukurisë. Me shumë krenari njoftoj se SKosmetics dhe SelfSKN janë zyrtarisht brandet e para shqiptare të kozmetikës që futen në rrjetin ndërkombëtar Lagardère Travel Retail… Ky nuk është vetëm një sukses i brandit tim, por një moment historik për kreativitetin dhe sipërmarrjen shqiptare,” ka shkruar Sara në postimin e saj.
Sipërmarrësja e njohur theksoi se ky hap e çon punën e saj në një nivel krejtësisht të ri:
“Krenare për rrënjët, krenare për punën, krenare që e çojmë emrin shqiptar në një prej rafteve më prestigjioze të botës. Ky është vetëm fillimi,” përfundoi ajo.
Ky sukses e vendos Sarën jo vetëm si një figurë të rëndësishme të botës së bukurisë, por edhe si një shembull frymëzues për çdo sipërmarrës shqiptar.
