Don Phenom është rikthyer me një intervistë ku nuk i kurseu aspak kolegët e tij në industrinë e hip-hopit shqiptar. I ftuar në Andale Media, reperi njihet për natyrën e drejtpërdrejtë, por këtë herë, deklaratat e tij ishin më të ashpra se kurrë.
Duke komentuar për transformimin e skenës rap dhe mungesën e përplasjeve të vërteta si dikur, ai nuk e fshehu zhgënjimin:
“Është çështja e komercialitetit dhe problemi është se tani janë bërë të gjithë motra dhe kur u vjen cikli, u vjen të gjithëve bashkë. Është shumë problem se nuk ka hiç konkurrencë.”
Por gjithçka u ndez edhe më shumë kur u pyet për mundësinë e një bashkëpunimi me Gjikon, Ledrin apo Butën. Fillimisht ai tregoi një qasje të butë:
“Janë të gjithë djem të mirë dhe s’më kanë bërë asgjë.”
Megjithatë, ky ton ndryshoi shpejt, duke lëshuar një nga deklaratat më të forta:
“Kam një perspektivë të jetës sime si reper. S’mund të jesh dhe reper dhe spiun. Në Shqipëri është OK të jesh spiun dhe reper, mbushet club-i, s’është asnjë problem. Kushdo që ka bërë një deklaratë në gjyq, nuk ka si të jetë reper. Hiphopi, sado komerc që të jetë, nuk bën të jesh aq i degjeneruar. Ka shumë që janë të tillë me deklarata në gjyq dhe unë nuk i mbështes. Kaq është.”
Kjo nuk është hera e parë që Don Phenom e thotë hapur mendimin për kolegët. Në vitin 2021, ai kishte bërë bujë me një postim në Instagram ku hoqi disa prej emrave të mëdhenj të skenës nga lista e ndjekësve dhe paralajmëroi:
“Shumë prej jush ju kam hequr prej friends list në Instagram se jeni dashakeqës, ejani dhe më takoni në qoftë se doni, mbytuni të gjithë, viti 2021 nuk ka më diplomaci, do jua heq maskat të gjithëve publikisht se prapa skenave shumë prej jush ju kam degjeneruar, e dini shumë mirë. U riktheva.”
Megjithatë, sot ai vetë thotë se preferon të mos japë më shembuj negativë dhe duket se ka zgjedhur një rrugë më të moderuar. Por, nëse e njeh Don Phenom-in, e di që diplomacia nuk zgjat shumë kur ka diçka për të thënë.
