Familja e Schumacher ka hedhur në gjyq revistën gjermane “Bunte” e cila kishte publikuar një artikull rreth tij, në të cilin shkruhej se 7 herë kampion i botës në garat me makina ishte në gjendje të hidhte disa hapa i vetëm, sipas deklaratave të një miku të familjes emri i të cilit nuk bëhej i ditur.
Kështu, avokati i Michael Schumacher ka deklaruar para një gjykate në Gjermani se ishpiloti i Formula 1 nuk është në gjendje të ecë.
Ai kaloi 6 muaj në koma pas një aksidenti me ski në dhjetorin e vitit 2013 dhe që atëherë, shumë pak informacione janë dhënë rreth gjendjes së tij, pasi familja po mundohet në çdo mënyrë që të ruajë privatësinë.
Avokati Feliks Dam tha para gjykatës “ai nuk mund të ecë” ndërsa saktësoi se nuk mund të ngrihej në këmbë as me asistencën e terapistëve të shumtë të punësuar nga familja. Revista gjermane në dhjetor publikoi një foto të Schumacher në faqen e parë me titullin “Ai mund të ecë përsëri”.
“Micheal është shumë i dobët”, theksonte miku i familjes. “Por ai mund të ecë përsëri falë ndihmës së terapistëve. Ai mund të hedhë dytre hapa, ai edhe mund të ngrejë lart krahun”.
