Elton Ilirjani ndau detaje të reja për jetën e Parashqevi Simakut gjatë një interviste në emisionin “Opinion”. Sipas tij, këngëtarja ikonë e muzikës shqiptare është përballur me përndjekje dhe pengesa të shumta në karrierën e saj, madje edhe nga ish-pjesëtarë të Sigurimit të Shtetit.
Ai zbuloi se “përndiqej nga Sigurimi i Shtetit” dhe se disa persona tentuan ta dëmtonin për shkak të famës dhe integritetit të saj. Ilirjani theksoi se kjo përndjekje nuk përfundoi me largimin e saj nga Shqipëria, por vazhdoi edhe në SHBA.
“Kur lançoi albumin ‘Equos From Illyria’ me një label të rëndësishëm amerikan, filloi goditja sërish nga këta persona që po e përndiqnin që nga Shqipëria për t’i shkatërruar karrierën. Arsyet janë të shumta. E para njëherë është xhelozia. E dyta sapo kishte filluar në Shqipëri tutorizmi i vajzave të bukura ku ajo nuk zgjodhi që të ishte pjesë.”
Në bisedën e tij me Blendi Fevziun, Ilirjani konfirmoi se pas vitit ’90, disa nga këta persona rifituan pushtetin dhe e ndoqën Simakun deri në SHBA.
Blendi Fevziu: Kishin fiksim seksual?
Elton Ilirjani: Po.
Blendi Fevziu: Ndaj saj?
Elton Ilirjani: Ndaj saj.
Blendi Fevziu: Dhe e kanë përndjekur?
Elton Ilirjani: Dhe e kanë përndjekur. Patjetër kanë pasur disa persona që pas viteve ’90 u rikthyen sërish në pozicionet që kishin dhe ishin përsëri pjesë e Sigurimit të Shtetit të cilët e përndiqnin dhe udhëtonin në SHBA. Ajo nuk i njihte fare.
I pyetur se pse Parashqevia dështoi në ëndrrën e saj amerikane, Ilirjani tregon:
“Ajo dështoi sepse ajo nuk zgjodhi që të ishte një “punonjëse seksi” siç janë shumë artistë të tjerë dhe në skandalet që keni parë në SHBA. Parashqevi Simaku është një person shumë i pastër, shumë i dashur, që ka besim të madh te Zoti. Ajo e rrezaton këtë. Kur ka shkuar në Hollivud, jo vetëm që nuk ka pasur mbështetjen e askujt nga shqiptarët, por edhe është goditur. Është goditur që në hapat e saj në Hollivud.”:
Sipas Ilirjanit, Simaku ka qenë një divë dhe ky status ka pasur të mirat dhe të këqijat e veta. Ai mohoi thashethemet se Simaku ka përdorur drogë apo se ka qenë e alkoolizuar.
“Ka pasur të mirat ky status, por ka pasur dhe të këqijat që është goditja e madhe që i është dhënë vetë nga bashkatdhetarët e saj në fushën e artit. Parashqevi Simaku ëndërronte të ishte yll në Hollivud dhe i kishte të gjitha kriteret. Problemi që ka hasur ajo ka qenë që është person që vjen nga një familje e varfër me norma dhe rregulla. Është folur shumë për jetën e saj private sikur bënte drogë, sikur është e alkoolizuar. Asnjë nga këto nuk është e vërtetë”, tha ai.
Sidoqoftë, jo gjithçka që Ilirjani di për Simakun mund të thuhet.
“Unë di shumë gjëra për Parashqevi Simakun. Jo të gjitha thuhen. Nuk thuhen për arsye se ka persona publikë në Shqipëri që janë përpjekur t’i shkatërrojnë karrierën dhe e kanë përndjekur atë dhe në jetën private me familjen e saj”, u shpreh ai.
