Selin vendosi të ndajë një histori thellësisht personale, duke e kthyer shtëpinë e Big Brother VIP Albania në një hapësirë rrëfimi dhe empatie. Mes lotësh, ajo kujtoi ditën kur vëllai i saj përjetoi për herë të parë kriza epileptike, një situatë që, siç tregoi ajo, e gjeti familjen të papërgatitur dhe të frikësuar për atë që po ndodhte.
“Si fillim dua t’i kërkoj falje Onos nëse mërzitet që po e ndaj me ju këtë. Në shtëpinë tonë kishte ardhur një nga hallat dhe unë isha në dhomën time me një nga kushërirat. Dëgjoj shumë ulërima dhe atë natë luante Shqipëria, nuk e di me kë, një ndeshje shumë e rëndësishme. Mendova se ka bërë gol dhe ishin brohorima gëzimi. Kur dal nga dhoma shikoj që Ono po kalonte një krizë epileptike dhe ne ishim vetëm, mami u tremb shumë dhe askush nuk dinte ta ndihmonte sepse nuk e kishim përjetuar kurrë, nuk e dinim çfarë të bënim në këtë rast. Më shkoi mendja për të dalë nga shtëpia jonë dhe për të shkuar te dera ngjitur e komshinjve”.
Selin tregoi se ajo periudhë u shndërrua në net pa gjumë dhe ankth të vazhdueshëm, pasi krizat ndodhnin shpesh gjatë natës dhe frika për të mos qenë pranë në momentin e duhur e mbante zgjuar.
“Mbaj mend që çdo natë para se të flija, kur gjithë kishin rënë në gjumë, unë e kisha shumë të vështirë të flija sepse krizat i ndodhnin vetëm natën dhe ngaqë isha e vetmja që e dëgjoja kur i niste kriza, doja të isha koshiente që të reagoja edhe më shpejt. Ulesha në këtë pozicion dhe lutesha në mënyrën time për të gjetur një zgjidhje, një shpjegim, Ono vetëm i përsëritej kjo. Pas shumë kohësh, gjyshërit e mi që jetojnë në Amerikë dhe janë dy njerëz fantastik dhe të nderuar, e marrin Onon për ndihmë mjekësore dhe për të kuptuar çfarë po kalonte. Aty kam patur një tjetër thyerje shumë të madhe se nuk isha mësuar të jetoja pa prezencën e tij në shtëpi. Për dy vite Ono nuk ka qenë në shtëpi, ka jetuar në Amerikë.”
