Pas humbjes së madhe që tronditi familjen Kasapi, nëna e artistit, Gjylymser Kasapi, ka zgjedhur të flasë publikisht përmes një reagimi emocional në rrjetet sociale. Me një mesazh të mbushur me dhimbje, por edhe mirënjohje, ajo falënderon të gjithë ata që kanë qëndruar pranë familjes në këto ditë të vështira, duke vlerësuar mbështetjen, respektin dhe fjalët ngushëlluese të marrë nga miq, të afërm dhe dashamirës.
Në reagimin e saj, një vend të veçantë zë nusja e Shpatit, Selvija. Gjylymser Kasapi ndalet te roli i saj si bashkëshorte dhe si nënë, duke theksuar përkushtimin dhe dashurinë që ajo ka treguar jo vetëm ndaj Shpatit, por edhe ndaj djalit të tyre të vogël, Roelit. Sipas saj, këto cilësi ishin themeli i lidhjes së fortë që çifti kishte ndërtuar ndër vite.
“Në mënyrë të veçantë dua të falënderoj Selvijen time të dashur, shpirtin e shtëpisë së Shpatit, e cila ishte jo vetëm një bashkëshorte e përkushtuar, por edhe një nënë e shkëlqyeshme,” shkruan ajo, duke nënvizuar se fakti që Shpati ndërroi jetë në krahët e saj është dëshmi e lidhjes së tyre të pathyeshme.
Në mbyllje të mesazhit, nëna e këngëtarit apelon për qetësi dhe respekt, duke paralajmëruar se çdo spekulim apo interpretim i pavend lidhur me ngjarjen do të marrë përgjigjen e duhur. Ajo kërkon që dhimbja e familjes të mos cenohet dhe që Selvija të trajtohet me dinjitet, duke theksuar se tejkalimi i kufijve nuk do të tolerohet, as moralisht dhe as ligjërisht.
Mesazhi i plotë:
“I falenderoj të gjithë familjarët e familjes KASAPI, familjes sime nga prindërit e mi dhe natyrisht të gjithë shoqërisë sonë në përgjithësi, kolegëve dhe artistëve nga të gjitha trevat shqiptare për mbështetjen dhe ndarjen me ne,të dhimbjes së madhe që po përjetojmë me largimin nga jeta të SHPATIT tonë të dashur për të gjithë…! Në mënyrë të veçantë dua të faleminderoj SELVIJEN time të dashur, shpirtin e shpitit tim Shpatit, i cili jo vetëm që e dashuronte por, e adhuronte për butësinë, çiltërsinë, moralin e një bashkëshorteje të devotshme, e cila maksimalisht ishte e përkushtuar jo vetëm si bashkëudhëtuese në jetën e tyre të përbashkët, por edhe si një nënë e shkëlqyeshme e nipit tim të vogël, ROELIT..! Kjo u vërtetua edhe me faktin se Shpati ndëroi jetë në krahërorin e Selvijes, mbi të cilët u hudh edhe Roeli, duke mos kuptuar se çka ndodhë…!!!Faleminderim të sinqertë dua të shpreh edhe për familjen e Sefer dhe Elida Jao, Agimin dhe Besnikun, një familje e mrekullueshme,të cilët gjatë gjithë periudhës martesore të Shpatit dhe Selvijes, kanë qëndruar afër nesh gjithëmonë, kurse Shpatin e kishin jo si dhëndrin por si djalin e tyre…!
Çdo spekulim ndryshe nga kjo që me zemër të thyer dhe lot në sy prej nëne, vjehre dhe gjysheje, do e dënoj jo vetëm moralisht por edhe ligjërisht…! Ju lutem atyre,që në këto momente mundohen të na shqetësojnë si familje në përgjithësi, cilindo prej emrave që përmenda më lartë, sidomos Selvijen time të dashur dhe të respektuar, e cila më mban të gjallë në këto çaste të rënda për mua, të lejojnë t’a përjetojmë dhimbjen tonë të thellë dhe le të shohin punët e tyre personale..!
Për fund, një FALEMINDERIM të thellë për gjithë ata që na ngushëlluan për Yllin, Dritën dhe Birin tim dhe të juajin SHPATIN…! PREHU NË PAQË SHPIRTI I MAMIT.”
