Pas golave spektatkolarë të shënua mbrëmjen e kaluar në ndeshjen Serbi-Zvicër, dy shqiptarët Granit Xhaka dhe Xherdan Shaqiri, në shenjë feste bënë simbolin e shqiponjës. Ky simbol u cilësua si shenjë provokimi nga serbët. Të pyetur për këtë futbollistët treguan se janë shumë të lumtur për fitoren dhe shqiponjën e kanë bërë pasi janë përfshirë nga emocionet.
“Emocionet ishin të vërteta. 15 minutat e para ne nuk ishim në fushë. Serbia na solli në vështirësi me shumë shanse. Gjatë pushimit vajtëm në dhomat e zhveshjes dhe nuk ishim aspak të kënaqur. Këtu erdhi reagimi në pjesën e dytë. Kjo skuadër ka bërë hapa para në përgatitjen mentale. Ne mund të reagojmë ndaj çdo kundërshtari. E pabesueshme, 2-1! Sot është festë për të gjithë. Për mua një lojë tepër speciale. Mijëra njerëz, familja nga Zvicra, nga Shqipëria, nga Kosova më kanë shkruar. Kjo fitore ishte për familjen time, e cila më ka mbështetur çdo herë. Festa nuk ishte mesazh për kundërshtarin. Festa ishte për njerëzit, që çdoherë më mbështesin, që asnjëherë nuk më lënë në baltë. Në vendlindjen time, ku i kanë rrënjët prindërit e mi. Ishin vërtet emocione të vërteta”, është shprehur Xhaka.
“Nuk dua të flas për këtë, në futboll ke emocione dhe mund ta shihni çfarë bëra. Është vetëm emocion, jam shumë i lumtur që shënova. Nuk mendoj se është koha të flasim për këtë festim. E kemi treguar prej vitesh dhe e shfaqëm përsëri sot në fushën e lojës. Ne e kthyem ndeshjen dhe sot jam shumë i lumtur”, është shprehur Shaqiri./revistawho.com
