Në të gjithë botën qytetarët janë të alarmuar pasi numri i të prekurve me Koronavirus çdo ditë është në rritje. Nga autoritetet përkatëse tashmë janë marrë masat e nevojshme për mbrojtjen nga Covid-19, ndërsa të shumta kanë qenë fytyra publike të cilët kanë thënë fjalën e tyre. Së fundmi edhe atletja Luiza Gega, ambasadore e “World Vision”, ka dhënë mesazhin e saj për të gjithë qytetarët. Gega i bën thirrje të gjithëve të qëndrojnë në shtëpi pasi shëndeti është më i rëndësishëm se gjithçka tjetër.
“Përshëndetje të gjithëve! Kjo është periudha kur pyetja “Si je”, merr kuptim më shumë se çdo herë tjetër. Si ambasadore e “World Vision” por dhe si një prej jush. Respektoni masat e sugjeruara nga autoritetet shëndetësore për të parandaluar përhapjen e Covid-19. Shiheni kohën e qëndrimit në shtëpi si një mundësi për të shijuar familjen tuaj.Shëndeti mbi të gjitha”: shprehet ajo në video mesazhin.
Aktualisht kampionia ndodhet në Kenia për t’u përgatitur për Lojërat Olimpike Tokyo 2020.
