Në pjesën e parë të programit “Top Show Magazine” sonte, u fol edhe një herë për sherrin e famshëm midis reperave shqiptarë Noizy dhe Cozman. Alban Dudushi nga studio realizoi një lidhje me “Skype” me Cozmanin dhe Skivin për të mësuar versionin e tyre të ngjarjes. Po ashtu përveç opinionistëve të këtij sezoni, ishin të ftuar edhe kryeredaktori i “revistawho.com” Eraldo Rexho dhe kryeredaktorja e suplementit “Bluetooth” në “Gazeta Shqiptare”, Enida Himaj. Dy reperët treguan me detaje se çfarë ka ndodhur sipas tyre pasditen që ndodhi sherri, dhe iu përgjigjën pyetjeve të gazetarëve. Pyetjes së gazetares Himaj, nëse është e vërtetë që Cozman e ka kërcënuar Noizyn duke i thënë të mos shkelë në Prishtinë ai iu përgjigj: “Nuk e kam kërcënuar kurrë Noizyn. E kam takuar edhe më herët nëpër plazhe e koncerte e s’ka pasur asgjë”. Ndërkohë Skivi konfirmoi për gazetarin Rexho se atë pasdite ai ishte në një takim me pronarin e hotelit ku ndodhi ngjarja, biznesmenin Behgjet Pacolli. Më poshtë mund të lexoni edhe dëshmitë e plota të bëra “live” të dy këngëtarëve:
Skivi
Ne nuk e nisëm, e nisën ata. Unë kisha një takim pune, dita e tretë që mbaja takime aty. Isha i shoqëruar me Sofia Kastriotin. Para portës ishin 10 veta jashtë. Sapo u afrova në hyrje ata filluan të më shanin në mënyrë të turpshme në prezencën e femrës. I thashë “shqipe ju lutem mos flisni se nuk është koha e as momenti”. Sapo u ula brenda e pa porositur e thirra menaxherin e hotelit dhe i shpreha shqetësimin maksimal. Ai foli me ta, u kthye dhe na kërkoi falje. I telefonava Cozmanit që të vinte të më merrte nga takimi se kishim punë. Pistoleta është nxjerrë për të frikësuar njerëzit. Unë isha brenda hotelit dhe s’kam qenë fare pjesë e përleshjes. Është e vërtetë se isha në takim me Behgjet Pacollin. Fyerjet s’më bëjnë përshtypje se jam njeri me integritet. S’ka të bëjë sherri me Babastars apo me të kaluarën e muzikën, se grupi është 20 veta. Nuk ja vëmë veshin provokimeve. Jemi të vetmit në industri që nuk fyejmë askënd. Janë gjëra të ulëta e jo adekuate për nivelin tonë. Nuk ka qenë kurrë në interesin tonë të bëjmë problem. Askush nuk ka anuluar koncerte për këtë shkak. Nëse përballemi sërish me Noizyn do të mbajmë të njëjtin qëndrim si gjithmonë. Po të mos prvokonte grupi OTR para katër viteve, asgjë nga këto nuk do të kishtë ndodhur.
Cozman
Duke ardhur në hotel isha me një shok, Albertin. Në oborr ishin shumë vetura. Sa hyra brenda në oborr shoh një grup me 10-15 veta. Sapo ndala veturën njëri prej tyre e rroki me krah pasqyrën time. Sapo dola jashtë 4-5 vetë më sulmuan. Nga ana tjetër një grup e sulmoi Albertin. Kemi nis një përleshje dhe pas disa sekondash kam dëgjuar të shtëna. Policia ishte aty dhe jam shtrirë për tokë.
