Anxhela Peristeri realizoi mbrëmjen e kaluar koncertin e parë recital të sajin, pas 17 vitesh karrierë. Nën emrin ‘Reflektim’ këngëtarja e njohur mblodhi të gjithë dashamirësit e muzikës së mirë në një mbrëmje speciale ku këndoi të gjitha këngët e repertorit të saj shumëvjeçar. Nga videot e publikuara gjithandej nëpër rrjete sociale u kuptua qartë që koncerti rezultoi një sukses. Miqtë e saj më të mirë, por jo vetëm mbushën sallën e Katedrales Ortodokse në mbështetje të muzikës së vërtetë.
Baladat që e kanë bërë të njohur emrin e saj ndër vite, emocionuan publikun, ndërsa këngët ritmike i bënë të gjithë të kërcejnë. Anxhela kishte edhe disa të ftuar specialë me të cilët këndoi disa këngë. Siç ishte paralajmëruar edhe më herët, Elhaida Dani këndoi krah Peristerit të parin duet në karrierën e këngëtares së njohur me një kolege femër.
Grupi Offchestra ishte një nga të ftuarit e tjerë, i cili gjithashtu këndoi me Anxhelën, por sollën edhe një nga projektet muzikore më të suksesshme të tyre. Hiti ‘Ishe mbret’ përcolli padyshim emocionin më të veçantë të mbrëmjes.
Si një nga këngët më të famshme të Anxhelës, publiku ja kërkoi ta sillte dy herë dhe të gjithë e kënduan me të. Këngët e saj kanë arritur t’i rezistojnë kohës, kjo falë potencialit dhe profesionalizmit që e karakterizon Anxhelën si artiste./revistawho.com
