Emma Stone është shpallur gruaja më e bukur në botë, sipas një analize që përdor “Raportin e Artë”, formulën e lashtë greke që mat përpjesëtimet ideale të fytyrës. Studimi, i drejtuar nga Dr. Julian de Silva në Qendrën për Kirurgji të Avancuar Kozmetike dhe Plastike të Fytyrës në Londër, e renditi aktoren fituese të dy çmimeve Oscar në vendin e parë me një rezultat mbresëlënës prej 94.72%.
“Ajo ishte fituesja e qartë kur të gjitha tiparet e fytyrës u matën për përsosmëri fizike,” shpjegon Dr. de Silva, duke theksuar se Stone shënoi rezultate të larta në vetulla (94.2%), nofull (97%) dhe buzë (95.6%).
E njohur për rolet në filmat “Poor Things” dhe “La La Land”, aktorja amerikane ka mahnitur publikun me elegancën dhe karizmën e saj, por këtë herë bukuria e saj është “konfirmuar shkencërisht”.
Studimi përdori teknologji të avancuar të hartëzimit të fytyrës për të krahasuar fytyrat e disa prej grave më të njohura të botës me raportin ideal 1.618, që përfaqëson harmoninë perfekte në art dhe natyrë — një standard i përdorur që nga koha e Leonardo da Vinçit.
Në vendin e dytë u rendit Zendaya me 94.37%, e ndjekur nga Freida Pinto (94.34%), Vanessa Kirby (94.31%) dhe Jenna Ortega (93.91%). Dhjetëshen e më të bukurave e plotësojnë Olivia Rodrigo, Margot Robbie, Aishwarya Rai Bachchan, Tang Wei dhe Beyoncé.
Sipas Dr. de Silva, këto rezultate tregojnë se “tani mund të zbulojmë matematikën pas bukurisë”, ndërsa shton se e njëjta metodologji po përdoret gjithnjë e më shumë në kirurgjinë estetike për të ndërtuar “harmoni të përsosur” në fytyrën njerëzore.
Emma Stone, sipas shkencës, nuk është thjesht një yll i Hollivudit — ajo është formula e gjallë e bukurisë së përkryer.
