Mbrëmjen e sotme u mbajt nata finale e festivalit europian “Eurovision”. 26 vendet finaliste konkurruan me këngët e tyre për të zënë vendin e parë, por Holanda arriti të rrëmbente votat e publikut dhe jurisë. Duncan Laurence me këngën “Arcade” mori 492 pikë dhe arriti të triumfonte, ndërsa Italia u rendit në vendin e dytë dhe në të tretin Rusia. Ndërkohë Jonida Maliqi mori gjithsej 90 pikë duke u renditur në vendin e 18-të.
Këngëtarja shqiptare edhe në natën finale elektrizoi gjithë sallën në Tel Aviv dhe dhuroi një performancë të jashtëzakonshme. Kënga “Ktheju Tokës” preku me mijëra fansa dhe Jonida u vlerësua si një nga zërat më potentë të këtij edicioni të “Eurovision”. Jonida u komentua gjatë edhe për veshjen e saj, të punuar nga stilisti shqiptar Ardi Asllani, sepse ngjasonte shumë me fustanin e një mbretëreshe ilire. /revistawho.com
