Shpat Kasapi, edhe pse është një nga këngëtarët më të pashëm shqiptarë, ka pasur sfidat e tij me pamjen. Sot, në programin Rudina, ai, veç angazhimeve artistike, që përfshijnë dhe interpretimin në një film, ka folur edhe për formën fizike duke treguar sesi para disa kohësh kishte shtuar shumë në peshë.
“Kam qenë 113 kile, ndërkohë që për gjatësinë që kam 1.90 duhet të jem 90, deri 88 kilogramë”, ka thënë ai. Megjithatë ka arritur të humbasë 20 kile duke ndryshuar stilin e jetës dhe tani peshon rreth 93, apo maksimumi 94 kilogramë.
Nëse po mendoni si e ka arritur, receta e Shpatit është aktivitet fizik dhe kujdes me ushqimin, dy shtyllat e forta për këdo që do të arrijë formë të mirë fizike. Shpati ka thënë që prej katër vitesh merret me not, por shkon edhe në palestër ku bën kryesisht biçikletë dhe ngritje peshash dhe ecën në natyrë. Gjithashtu ai ka hequr dorë nga brumërat dhe sheqernat, por edhe pijet alkoolike. “Jeta e natës ndikon shumë në shtimin në peshë”, ka thënë ai duke sqaruar që tani e ka braktisur këtë rutinë. Tani ushqimet e tij më të dashura janë sallatat, frutat e detit dhe proteinat. Punë e mirë Shpati!/ Class
