Qeveria shqiptare ka nisur zbatimin e vendimit për të bllokuar TikTok-un në vend, duke ndërprerë aksesin në këtë platformë për përdoruesit.
Në lidhje me përpjekjet për të anashkaluar këtë ndalim, ekspertët paralajmërojnë se mënyra për t’ju shmangur bllokimit duke përdorur VPN falas mund të jetë shumë e rrezikshme pasi hackerat mund të grabisin të dhënat e telefonit.
Në përgjigje të kësaj, qeveria ka dhënë një deklaratë duke i ftuar të rinjtë të presin dhe pak pasi shumë shpejt do të gjehet një zgjidhje: “Kijeni parasysh këtë gjë dhe duroni pa TikTok për ca kohë deri kur të përfundojmë programin e përbashkët me kompaninë, e cila do të vijë së shpejti në Shqipëri dhe do të paraqesë planin për adoleshentët”.
Vendimi për ndalimin e TikTok është marrë si një masë për mbrojtjen e të dhënave personale dhe sigurisë kibernetike. Autoritetet shprehen se ndalimi, i cili do të zgjasë deri në 12 muaj, synon të minimizojë rreziqet që lidhen me privatësinë dhe ndikimet negative sociale, veçanërisht tek të rinjtë.
Nga ana tjetër, ekspertët e sigurisë paralajmërojnë se përdorimi i VPN-ve për të anashkaluar kufizimin mund të sjellë rreziqe serioze. Shumë shërbime VPN falas mund të përmbajnë malware, të mbledhin të dhënat e përdoruesve ose t’i ekspozojnë ato ndaj palëve të treta. Për këtë arsye, përdoruesit duhet të jenë të kujdesshëm përpara se të kërkojnë mënyra alternative për të hyrë në TikTok.
