Një vajzë shqiptare përjetoi dje tmerrin dhe panikun që pushtoi Manchester-in pas koncertit të Ariana Grande-s, ku edhe ajo ishte prezente. Ajo u kundërpërgjigjet komenteve të të rinjve shqiptarë në rrjetet sociale që shprehin pak ose aspak interes për ngjarjen e rëndë që u mori jetën 22 personave dhe la 59 të plagosur pas sulmit terrorist.“Është e tmerrshme si nëpër komente rinia shqiptare tallet, kur ne mbrëmë kemi parë tmerr me sy.”, shprehet ajo. 25-vjeçarja rrëfen për Anabel.al se gjithçka ndodhi aq shpejt dhe në mënyrë aq të frikshme, sa as forcat e rendit nuk po dinin si të reagonin. Ajo thotë se tashmë, edhe po të jesh në mes të Britanisë së Madhe, nuk je më i sigurtë. “Përfundimisht, askund nuk jemi të sigurt. Mbrëmë kishte patrulla kudo dhe prapë, ndodhi ajo që ju tashmë e dini, dhe ne e përjetuam. Zoti qoftë me ne.” Gjatë koncertit, vajza ndodhej shumë afër skenës, në radhën e dytë afër rojeve të sigurisë, siç dallohet edhe në foton që ka shkrepur. Vajza, që parapëlqen të mbetet anonime për hir të të afërmve këtu në Shqipëri, shprehet e tronditur pas kësaj përvoje. Sado të përpiqemi ta marrim me mend, vetëm ajo që e ka përjetuar mund ta kuptojë. “Nuk e di, aty të kalon jeta para syve. Thua: ‘Dola për qejf, e ku jam tani.’” “Uroj të mos e provoni kurrë, as ju e as të afërmit tuaj”.
Burimi: anabel.al
https://www.youtube.com/watch?v=NMrF1gvVBNY
