Këtë vit Jonida Maliqi pritet të përfaqësojë Shqipërinë në festivalin më të madh europian ‘Eurovision’. Ajo do të prezantohet me këngën ‘Ktheju tokës’, që ka një mesazh shumë të fuqishëm për emigrimin e shqiptarëve. Mbrëmjen e djeshme Jonida ishte e ftuar në emisionin radiofonik ‘CityNight RadioShow’, gjatë të cilit këngëtarja zbuloi detaje të reja mbi performancën e saj. Gjithashtu këngëtarja tregoi se do të ndërmerrte përsipër një nismë, që Shqipëria të përfaqësohet njësoj si vendet e tjera europiane. Duke qenë se fondet e ‘Radio Televizionit Shqiptar’ nuk mjaftojnë për përfaqësimin dinjitoz të Shqipërisë, Jonida ka vendosur të kërkojë personalisht ndihmë në çdo institucion dhe biznes shqiptar.
“Do mundohem maksimalisht që të përfaqësojë siç duhet Shqipërinë. Na duhen suporte të fuqishme nga njerëzit tanë, kështu që unë përpos gjithë angazhimit që ka ‘RTSH’, kam marrë përsipër që të takojë personalisht si ambasadore e Shqipërisë, si një qytetare që duhet të përfaqësojë vendin tim, të kërkoj suportin e të gjithë atyre që e mbështesin këtë gjë”, – është shprehur Jonida. Nisma e saj është përgëzuar nga të gjithë, duke qenë se ajo është e para artiste që ka vendosur të bëjë diçka të tillë për përfaqësimin e Shqipërisë në ‘Eurovison’. Maliqi do të këndojë në datë 16 maj në Tel Aviv të Izraelit. /revistawho.com
