Ministri i Turizmit, Blendi Klosi ka qenë në një lidhje direkte me edicionin e lajmeve të orës 15:30 në televizionin Klan, ku sqaroi teleshikuesit rreth sezonit të ri turistik dhe tregoi se si do të organizohet ai.
Klosi u shpreh se vendimi për të hapur plazhet dhe zonat e tjera turistike i takon mjekëve, në mënyrë që asnjë njeri mos të rrezikohet nga pandemia e ‘Covid-19’.
“Kjo ditë shënonte hapjen e sitës së plazhit, do duhet të ishin plazhet plot, por pandemia na ka vënë në rrezik dhe them që prioritet është jeta e njerëzve, pastaj teknikat dhe politikat, për hapjen më shumë a më pak do e vendosin doktorët. Ka ardhur koha të mendojmë për turizmin, kemi filluar të bëjmë një strategji. Ka nevojë që të mbështetet turizmi duke bërë pushime brenda kufijve.
Ajo që do punojmë me Ministrinë e Shëndetësisë janë parimet e Organizatës Botërore të Turizmit por dhe me dakordësim me partnerët e rajonit, po përgatisim rregullat për distancimin social edhe në zonat e plazhit, po përgatisim edhe opinionin që dhe këtë vit plazhi nuk mund të jetë si në 2019, do jetë gjithçka më e reduktuar. Por ne shpresojmë që do të kemi mundësi që sezoni të ketë turizëm”, pohoi ministri i turizmit gjatë lidhjes direkte.
Ai e përfundoi lidhjen direkte duke pohuar se vendi ynë ka kapacitet e duhura për të përballuar turistët vendas dhe jo vetëm, megjithatë rregullat do të jenë ndryshe nga viti i kaluar përsa i përket zonave të plazhit./revistawho.com
