Avokatja Irena Kita është një nga femrat që i kushton më shumë rëndësi imazhit në Shqipëri dhe që vitet e fundit e shfaq pasionin e saj për pamjen, veshjen, kombinimet dhe stilin edhe në blogun e saj.
Megjithatë blogu është shumë më i vonë sesa shija e saj për të bukurën, që e ka shoqëruar prej shumë kohësh, edhe atëherë kur nuk ishte një personazh i njohur. Është interesante të shohësh çfarë ka zgjedhur kjo vajzë me një sens të fuqishëm ndaj modës, ditën e dasmës. Në programin Rudina, ku Irena ishte e ftuar me bashkëshortin, Arvinin, janë shfaqur edhe disa foto nga dasma e tyre e vitit 2010 ku Irena është një nuse super elegante.
Ajo ka zgjedhur një fustan pas trupit, të mbyllur në pjesën e sipërme dhe me mëngë të vogla që zgjerohet në pjesën e poshtme në formë sirene. Fustani i mbuluar me dantellë ka një bisht të gjatë nga pas. Ndërkaq për flokët Irena ka zgjedhur një topuz të rregullt që e bën më klasike pamjen e saj atë dite, poshtë të cilit kapet velloja dhe mban vathë të gjatë. Një pamje prej princeshe. Edhe pamjet nga klipi të fusin në një atmosferë kopshtesh mbretërore, që kthehen në skenë për një romancë të bukur, siç është ajo mes Irenës dhe Arvinit.
Sigurisht edhe dhëndri, me të njëjtin pasion për të bukurën, është shumë elegant me kostumin e tij gri të errët. Është për t’u përmendur që Arvini atë ditë kishte edhe detyrën shtesë për të kënaqur rreth 100 të ftuarit e dasmës së tyre me një menu të zgjedhur me disa pjata personale të kuruara me shumë kujdes…
Megjithatë, gjithçka shkoi mirë, me zgjedhjet bazë të tij dhe kujdesin për detajet të Irenës. Duhet të jetë me siguri kënaqësi e veçantë t’u kthehen fotove dhe videos së dasmës së tyre. Dhe me këtë zgjedhje për të qenë elegante dhe klasike dhe Irena nuk do ketë asnjë peng për look-un e saj rreth shtatë vjet më parë, në ditën më të rëndësishme për një vajzë, atë të dasmës./revistaclass.al
