Ermal Fejzullahu nuk është vetëm një emër i njohur i skenës muzikore shqiptare – ai është edhe një rrëfimtar i sinqertë që di t’i japë jetë kujtimeve. I ftuar së fundmi në podcastin “Flet” me Ilnisa Agollin, këngëtari ndau disa prej momenteve më të veçanta nga karriera dhe jeta e tij personale.
Teksa fliste për lidhjen me muzikën dhe babain e tij, Sabri Fejzullahun, Ermali ndaloi tek një temë e ndjerë për artistët: emocionet që sjell skena.
“Unë mendoj që skena duhet marrë gjithmonë me emocion. Një artist që nuk ndjen emocion, nuk është artist i vërtetë,” tha ai.
Por ajo që bëri më shumë përshtypje ishte mënyra sesi lindi një nga këngët më të dashura të tij: “Kcejna mbi tavolina.” Nuk ishte një projekt i menduar gjatë apo i planifikuar me strategji. Ishte thjesht një natë verore në një club në Ulqin, kur ai dhe Lumi B, mes energjisë dhe atmosferës së nxehtë, u frymëzuan nga një këngë që po “shpërthente” në atë kohë – “Gasolina.”
Ideja për ta sjellë në shqip, në një stil krejt ndryshe, lindi aty për aty. Dhe siç tregoi Ermali, pas disa muajsh ajo u kthye në realitet:
“Pas disa muajsh, e bëmë këngë. Ishte Big Bang ai që e solli në jetë.”
Po aq prekëse ishte edhe një moment tjetër personal, kur gjatë performancës së këngës “Për një dashuri”, ai tha:
“Po e këndoja me shpirt, kur pashë një pasqyrë përballë dhe aty m’u shfaq ai Ermali i vogël. Pastaj kuptova që kisha ndryshuar shumë fizikisht, por emocionet ishin të njëjtat,” – kujtoi me të qeshur.
