Ju ndoshta mund ta keni harruar aventurën e çmendur dhe tepër të rrezikshme të Ergys Stefhasanit, e cila ngjan me skenat e filmave aksion, por që në fakt është realizuar e gjitha në Tiranë.
Bëhet fjalë për një ngjarje të ndodhur më 2 gusht të vitit 2015, ndërsa kohët e fundit gjykata e Tiranës ka përfunduar gjykimin ndaj 27-vjeçarit, i cili pas mesnatës tentoi të arratisej nga patrullat e policisë, të cilat i ishin vënë në kërkim.
Sipas Gjykatës, i pandehuri Ergys Stafhasani, me dy vajza e një djalë pasagjerë në automjet ka kaluar tri kryqëzime me semafor të kuq, nuk i është bindur shenjës “stop” të tri patrullave policie, dukë vënë në rrezik edhe jetën e efektivëve. Në momentin e ndalimit, sipas Gjykatës, ai ka kundërshtuar me forcë punonjësit e Policisë, si edhe ka rezultuar se kishte konsumuar pije alkoolike në masën mbi 0.51 mg/l, shkruan Panorama.
I pandehuri Ergys Stafhasani është fajësuar për “mosbindje ndaj urdhrit të punonjësit të Policisë së rendit publik” dhe “drejtim të mjetit në mënyrë të parregullt”, duke u dënuar përkatësisht, me 2 vjet dhe 5 muaj burg. Në bashkim të dënimeve, i pandehuri është dënuar me një dënim të vetëm prej 6 muajsh burg, dënim që u ul në 4 muaj nga gjykimi i shkurtuar.
I pandehuri tjetër në proces, Besmir Stafhasani, pasagjer në automjetin e “ndjekjes së çmendur”, u dënua me 100 mijë lekë gjobë për “kundërshtim të punonjësit të policisë së rendit publik”. Të pandehurit janë hetuar dhe gjykuar në gjendje të lirë. Sipas gjykatës, ndjekja ka nisur në Unazë pranë Inxhinierisë së Ndërtimit, ku mjeti i drejtuar nga i pandehuri Ergys për pak është përplasur me një mjet policie, teksa ka dalë nga rruga dytësore. Për shkak të shpejtësisë, policia i është vënë në ndjekje, por mjeti ka kaluar “21 dhjetorin” në drejtim të “Vasil Shantos” me semafor të kuq.
Është njoftuar salla operative dhe gjithë shërbimet e Policisë Rrugore, për një mjet që lëvizte me shpejtësi të madhe dhe në mënyrë shumë të shkujdesur. Semaforët e dy kryqëzimeve pasardhëse janë kaluar po me të kuqe nga mjeti. Te sheshi “Ëillson” mjeti nuk i është bindur “stop”-it të një patrulle policie. Në bulevard, ndjekjes i është shtuar një tjetër patrullë. Ndalimi i mjetit është bërë i mundur nga një autopatrullë pranë Liceut Artistik.
I pandehuri Ergys Stafhasani ka deklaruar se nuk ka parë shenja ndalimi dhe se në momentin që ka parë një automjet policie me fenelina, ka ndaluar. Ai ka pretenduar se është goditur nga policia, kur është prangosur. I pandehuri tjetër ka deklaruar se nuk ka ushtruar veprime kundërshtuese, por është dhunuar nga punonjësit e policisë. Një nga vajzat e pranishme në mjet, ka deklaruar se kishte parë momentet kur drejtuesi i mjetit kishte thyer semaforin dhe ndjekjen e policisë dhe se i kishte kërkuar disa herë të ndalonte./Panorama.
