Tek një intervistë televizive në Alsat, halla e Shpat Kasapit ka folur për herë të parë publikisht pas ndarjes nga jeta të artistit dhe ka sjellë para audiencës një tjetër këndvështrim rreth periudhës së fundit të karrierës së tij.
Sipas saj, Shpati gjatë viteve të fundit ishte përpjekur të lidhte bashkëpunime të reja muzikore, por këto përpjekje, siç thotë ajo, rezultuan të pa realizuara. Familjarja e këngëtarit rrëfeu se shumë prej mesazheve të tij mbetën pa përgjigje, pavarësisht insistimit.
Ajo e kujtoi nipin e saj si një artist me shumë pasion dhe punë, duke u shprehur se publiku do ta mbajë mend për energjinë dhe shpirtin që solli në skenë. Megjithatë, deklarata e saj që po bën xhiron e rrjetit është pikërisht ajo që lë të kuptohet një mungesë mbështetjeje profesionale nga kolegët:
“Ajo që më dhemb më shumë është se Shpati kërkoi, kërkoi bashkëpunime e ndoshta as mesazhet nuk ia kanë lexuar! Pse nuk i duam kurrë kur kemi njëri-tjetrin? Kjo është e dhimbshmë”, shprehet mes tjerash halla e Shpatit.
