Silvio Berlusconi: Jam bërë vegjetarian; Komentuesit: E bën për votat e animalistëve

Ish-Kryeministri italian Silvio Berlusconi ka vendosur t’i thotë lamtumirë mishit. Prej ditës së sotme ai është vegjetarian. Mediat në shtetin fqinj raportojnë se Kavalieri ka deklaruar që nuk do të konsumojë kurrë më mish dhe se nuk e kupton se si mund të vazhdojnë njerëzit ta bëjnë këtë gjë, duke ditur se sa vuajnë kafshët kur theren. “Që kur lexova për kafshët e destinuara drejt therjes, pra drejt vdekjes, më iku dëshira për të konsumuar mish. Mund të bëj edhe pa këtë. Dhe do e bëj!”, ka thënë Berlusconi. Më tej ai shtoi: Po flasim për gjallesa të mrekullueshme. Si mund të vriten? Si mund të hahen? Pas kësaj deklarate, gojët e liga në Itali thonë se kjo lëvizje e Kavalierit është krejtësisht politike me qëllimin e pastë që të marrë votat e atyre që dashurojnë dhe mbrojnë kafshët.