S’ka më profile false, Facebook-u vendos ‘gjurmuesin’ e ri

Facebook është përballur me llogari të rreme në rrjetin social për një kohë të gjatë. Por, kompania shumë shpejt pritet t’i japë fund kësaj lufte. Kompania është duke punuar në një opsion të ri i cili do t’i përjashtojë të gjithë përdoruesit e rremë nga rrjeti social. Sipas Mashable, opsioni i ri e Facebook i njofton përdoruesit kur detekton një llogari të rreme që dikush e ka hapur për t’i mashtruar ata, transmeton Gazeta Express. Kur opsioni e zbulon një llogari të tillë, ai e paralajmëron përdoruesin. Për t’i identifikuar këta përdorues, ky opsion kontrollon profilet e tyre. Rrjeti social e ka testuar këtë veçori tashmë me 75% të përdoruesve në botë, dhe thuhet se shumë shpejt “gjurmuesi” i profileve false do të jetë plotësisht funksional dhe nuk do të ketë më llogari të rreme.