Gjatë këtij viti, firma të njohura si ‘Prada’ apo ‘Gucci’ janë kritikuar për shkak të mesazheve negative që kanë përcjellë tek publiku nëpërmjet veshjeve të tyre. Këtë herë, bëhet fjalë për veshjet e firmës së njohur ‘Burberry’, në sfilatën e tyre të fundit. Ka qenë modelja Liz Kennedy e cila ka reaguar për një bluzë që ajo vetë ka veshur në pasarelë. Liz e ka quajtur këtë situatë të bezdisshme dhe frustruese. “Vetvrasja nuk është modë, nuk është diçka magjepsëse dhe meqenëse kjo shfaqje i është dedikuar të rinjve që shprehin mendimin e tyre, po e nis unë. Riccardo Tisci dhe kushdo tek ‘Burberry’, si mund të lejoni një veshje të tillë me një litar rreth qafës, si ai që përdoret për t’u vetvarur në tavan? Kërkova të flisja me dikë për këtë gjë, por e vetmja gjë që mu tha të bëja, ishte të shkruaja një letër për këtë çështje”, ka shkruar modelja në një postim në ‘Instagram’. Menjëherë, drejtori ekzekutiv i ‘Burberry’, Marco Gobbetti ka reaguar duke i kërkuar falje Liz për shqetësimin e krijuar. Gjithashtu, kjo bluzë është hequr nga koleksioni ‘Vjeshtë/Dimër 2019’. Marco justifikoi dizenjuesit duke thënë se janë inspiruar nga tema detare, që ishte në qendër të koleksionit, pa kuptuar se ishte bërë një gabim./revistawho.com
https://www.instagram.com/p/Bt_e9OpgGG3/
