Një episod i rëndë ka vënë në qendër të vëmendjes familjen Baldwin në SHBA. Alaia Baldwin, motra e Hailey Bieber, ndodhet nën hetim penal pas një ngjarjeje të ndodhur në një lokal nate në Savannah, Georgia, ku akuzohet për dhunë ndaj stafit.
33-vjeçarja u arrestua në shkurt të vitit 2024, pasi sipas raportimeve të Us Weekly, ajo dyshohet se u përfshi në një konflikt të ashpër brenda një bari, që përfundoi me akuza për sulm ndaj tre punonjësve të lokalit. Rasti ka shkaktuar reagime të shumta për shkak të natyrës së rëndë të pretendimeve.
Sipas dokumenteve hetimore, prokuroria e Xhorxhias ka ngritur katër akuza për kundërvajtje: sulm i thjeshtë, dhunë e thjeshtë dhe dy raste të shkeljes së pronës. Nëse shpallet fajtore, Baldwin rrezikon deri në një vit burg, ndërsa seanca për dënimin është caktuar për datën 23 prill.
Ngjarja thuhet se nisi kur Alaia Baldwin hyri në tualetin e stafit dhe iu kërkua të përdorte tualetin e klientëve. Ajo dyshohet se reagoi në mënyrë agresive, duke kaluar në kërcënime dhe më pas në dhunë fizike. Sipas deklarimeve, një roje sigurie u sulmua duke iu shkulur flokët, ndërsa një tjetër u godit me shqelma në organet gjenitale gjatë përpjekjeve për ta neutralizuar situatën.
E përfshirë në incident ishte edhe një kamariere, e cila u përball me Baldwin kur tentoi të hynte në tualetin e stafit. Në një intervistë për TMZ, kamarierja Hailey Coley rrëfeu se u kishte bërë të qartë Baldwin dhe shoqeve të saj se hyrja në atë ambient nuk lejohej dhe se më pas kishte vënë re se “lavamani ishte plot me të vjella”.
Coley tregoi se pasi u kthye në banjo për të parë çfarë po ndodhte, Baldwin i hodhi një tampon të përdorur. “Unë thashë, ‘Dëgjoni, ju djema duhet të largoheni,’ ” tha Coley, duke shtuar se Baldwin iu përgjigj: “Nuk më besoni? Doni ta shihni?” përpara se t’ia hidhte tamponin. Pas kësaj, sigurimi u njoftua dhe ajo u nxor jashtë lokalit.
Kamarierja ka shprehur bindjen se Baldwin ishte nën ndikimin e alkoolit dhe nuk e ka përjashtuar mundësinë e një padie civile. “ Sepse ky është lëngu trupor i dikujt që ra në kontakt me mua. Kjo është thjesht e papranueshme dhe është plotësisht e pajustifikueshme, veçanërisht kur dikush po përpiqet të të ndihmojë.”
Nga ana tjetër, Alaia Baldwin i ka deklaruar policisë se veproi në vetëmbrojtje. Megjithatë, një raport i siguruar nga E! citon se: “Zonja Baldwin deklaroi se u nxor me forcë nga klubi. Fillimisht ajo mohoi të kishte hyrë me forcë në tualet, duke deklaruar vetëm se kishte nevojë ta përdorte atë për të vjellë dhe për të ndërruar tamponin”, si dhe se “fillimisht ajo mohoi ta kishte hedhur tamponin e përdorur te kamarierja, por më vonë deklaroi se po.”
Avokati i saj, Drew Findling, reagoi për TMZ duke sqaruar rrethanat e udhëtimit të saj në Savannah dhe shprehu pendesën e klientes:
“Më 24 shkurt 2024, znj. Baldwin udhëtoi për në Savannah, Georgia për të festuar martesën e afërt të një shoqeje të ngushtë. Fatkeqësisht, ajo që duhej të kishte qenë një mbrëmje argëtuese vajzash mori një kthesë të papritur. Znj. Baldwin është e turpëruar dhe e penduar për ngjarjet e asaj nate dhe po merr masat e nevojshme për t’u siguruar që kjo të mos ndodhë më kurrë.”
Ngjarja mbetet ende nën hetim, ndërsa pritet që procesi gjyqësor të hedhë më shumë dritë mbi një nga incidentet më të bujshme që kanë përfshirë familjen e njohur Baldwin.
