Gjatë mbrëmjes së djeshme, drejtori i Teatrit Kombëtar, Hervin Çuli është përleshur me gazetarin e kulturës në ABC News, Eni Shehu. I tronditur nga ajo që ka ndodhur, gazetari Eni Shehu, ka gjetur mundësinë të tregojë shkurtimisht për Opinion.al atë çfarë ka ndodhur mes tij dhe drejtorit të Teatrit Kombëtar, Hervin Çuli, në hollin e institucionit kulturor. Sipas gazetarit të ABC News, ai ishte aty bashkë me gazetarë të tjerë i ftuar për të ndjekur premierën e shfaqjes “Tri Motrat” me regji të Hervin Çulit. Në momentin e ndërrimit të akteve, kur të pranishmit në sallë janë lajmëruar për 15 minuta pushim, gazetari ka dalë në hollin e teatrit, aty ku në mënyrë të papritur sipas tij është ndeshur me dhunën dhe ofendimet e drejtorit të Teatrit Kombëtar, i cili si duket se ruante një inat të vjetër me gazetarin Shehu, për shkak të një materiali filmik që Shehu kohë më parë kishte përgatitur mbi mënyrën se si përzgjidhen aktorët në shfaqjet e Teatrit Kombëtar. Drejtori Çuli, sipas të thënave të gazetarit Shehu, i është drejtuar këtij të fundit me fjalët: “More shkërdhatë, ti ke ardhur të prishësh shfaqjen time…”, – ku më pas ka pasur edhe dhunë ndaj gazetarit. Ndërkohë që vetë gazetari ka thënë për Opinion.al se nuk ka bërë denoncim mbi rastin, ndërsa redaksia e informacionit të ABC News i ka kërkuar Kryeministrit Rama dhe Ministres së Kulturës, Mirela Kumbaro, shkarkimin nga detyra të Drejtorit të Teatrit Kombëtar, Hervin Culi.
Megjithatë dje në mbrëmje, drejtori Çuli dhe sot në mëngjes edhe Teatri Kombëtar, kanë dalë në një deklaratë zyrtare ku thonë se gazetari provokoi dhe shqetësoi me fjalë e batuta aktorët gjatë interpretimit në skenë, duke zhurmuar, qeshur, trazuar, ata dhe mjedisin përreth.
Por një tjetër zë, i pranishëm gjithashtu dje në shfaqje, ka mohuar në mënyrë kategorike të gjitha akuzat e institucionit për kolegun gazetar, duke thënë se ishte ngjitur me të dhe se Shehu nuk bëri asgjë për t’i tërhequr vëmendjen aktorëve. Fatmira Nikolli, redaktore e kulturës në “Gazeta Shqiptare” përmes dy postimeve në “Facebook” ka sqaruar gjithë çfarë ka ndodhur në sallë. “Pritet nga çasti në çast, të thuhet se ‘gazetari doli në skenë dhe i kapi aktorët për fyti’. S’ka mbetur gjë tjetër pa u shpifur! Nuk e kuptova se nga i dëgjuan “zyrtarët” në shtëpi fyerjet e Eni Shehut kur nuk i ka dëgjuar njeri në skenë a në sallë. Manipulimi i opinionit publik – i frikshëm. Hajde e kërko reagim zyrtar nga këta njerëz që për ngjarje që i sheh me sytë e tu, gënjejnë. Mendo çfarë bëhet me çështje të tjera kyçur në zyra, sirtarë e pas muresh”, – shkruan në statusin e saj sot në mëngjes, gazetarja Nikolli.
