Pas sherrit të ndodhur mbrëmë gjatë provave gjenerale të shfaqjes “Tri Motrat” mes drejtorit të Teatrit Kombëtar dhe gazetarit të “ABC News” Eni Shehu, ka pasur sot një sërë reagimesh. Madje lidhur me këtë ka pasur edhe një deklaratë nga vetë institucioni.
“Gazetari provokoi dhe shqetësoi me fjalë e batuta aktorët gjatë interpretimit në skenë, duke zhurmuar, qeshur, trazuar, ata dhe mjedisin përreth”, – shkruhej në deklaratën për shtyp të Teatrit Kombëtar, ndërkohë që ka reaguar për këtë edhe nëndrejtori i këtij institucioni, duke mbrojtur tezën e Çulit.
“Mbrëmë në një sallë të mbushur plot si asnjëherë në prova gjenerale gazetari që pretendon se është dhunuar, përgjatë dy akteve të para të shfaqjes është sjellë në mënyrë të papranueshme. Ka ngacmuar me fjalë aktorët, duke shoqëruar me batuta fyese veprimet e tyre skenike dhe duke na rikthyer imazhet e të fortëve që vinin në sallën e teatrit në vitet ’98-‘99 vetëm për të shprehur frustrimet e tyre. I tërhoqëm disa herë vëmendjen gjatë shfaqjes, por sasia e drogës që do kishte konsumuar e kishte bërë një person të papërgjegjshëm. Në pushim të akteve i kërkuam të largohej nga shfaqja. Tre herë e refuzoi kërkesën tonë. U detyruam ta shoqëronin jashtë sallës. Ai mund të pretendojë se është dhunuar, por vetëm është shoqëruar prej krahësh jashtë godinës. Një veprim të tillë do të bëhej me çdo person që do kryente aktet e tij. Statusi prej gazetari nuk e bën imun ndaj sjelljeve të padenja në një institucion arti”, – ka përfunduar Noset Shijaku. Lidhur me akuzat për drogë ka reaguar gazetari Eni Shehu, i cili thotë se është i gatshëm të bëjë çdo lloj testi.
