Sonte në mbrëmje, në mitikun “Wembley”, Kombëtarja Shqiptare nis ëndrrën drejt kualifikimit për Botërorin. Përballë do të ketë një nga ekipet më të fuqishme të futbollit botëror, Anglinë, në një sfidë që premton emocione dhe spektakël.
Me një stadium të mbushur plot, ku rreth 20 mijë tifozë shqiptarë pritet të jenë të pranishëm, trajneri Sylvinho dhe ekipi i tij synojnë të shkruajnë historinë. Edhe pse Anglia është favoritja e padiskutueshme, Shqipëria vjen e motivuar dhe me dëshirën për të surprizuar.
Në prag të kësaj ndeshjeje të rëndësishme, trajneri brazilian i Shqipërisë, Sylvinho, ka theksuar se skuadra e tij do të japë maksimumin në fushë:
“Do të jetë një përballje shumë e vështirë, por në futboll gjithçka është e mundur. Duhet të luajmë si ekip, të mbrojmë mirë dhe të tentojmë të krijojmë diçka të veçantë në sulm.”
Gjendja e mbrojtësve Ismajli dhe Kumbulla mbetet ende në dyshim, por Sylvinho nuk ka dhënë detaje rreth formacionit që do të zbresë në fushë.
Kapiteni Berat Gjimshiti është i ndërgjegjshëm për forcën e Anglisë, por ka theksuar se ekipi do të luftojë për ëndrrën e tij.
“Njerëzit mund të thonë se disa ëndrra janë të pamundura, por ne kemi treguar që gjithçka është e arritshme. Askush nuk e mendonte që do të shkonim në Evropian, por ja ku jemi. Do të japim gjithçka në fushë.”
Në seancën e fundit stërvitore në Wembley, lojtarët kanë treguar përqendrim maksimal. Shqipëria pritet të luajë me Strakoshën në portë, ndërsa mbrojtja do të përbëhet nga Balliu, Ajeti, Gjimshiti dhe Aliji. Mesfusha do të drejtohet nga Asllani dhe Ramadani, me Lacin, Asanin dhe Bajramin në mbështetje të sulmuesit, që mund të jetë Manaj ose Uzuni.
Në gjashtë përballjet e mëparshme mes dy ekipeve, Anglia ka triumfuar gjithmonë, me ndeshjen e fundit që përfundoi 5-0 në favor të “Tre Luanëve”. Megjithatë, kuqezinjtë janë të vendosur të ndryshojnë historinë dhe të fillojnë kualifikueset me një paraqitje dinjitoze.
Me një “Wembley” që pritet të vishet kuqezi nga mbështetja e zjarrtë e tifozëve shqiptarë, ekipi kombëtar ka një mision të qartë: të tregojë se ëndrrat mund të bëhen realitet.
