Themeluesi i ‘Top Medias’, Dritan Hoxha, ditën e sotme do të festonte gjysmë shekulli jetë, 50-vjetorin e lindjes së tij. Të gjithë personat që kanë pasur fatin të punojnë me të e kanë cilësuar si njeriun më energjik dhe pozitiv, që gjithmonë kishte një ide të re në mendje. Nëse ai do të ishte gjallë, sigurisht që kjo dite nuk do të lihej pa u festuar mes familjarëve, miqve dhe kolegëve. Megjithatë kujtimi i tij mbetet dhe këtë 16 tetor nuk kanë se si ta harrojnë të gjithë ata që Dritan Hoxha u hapi për herë të parë dyert për të punuar në një nga mediat më të mëdha shqiptare. Hoxha ishte ndër të parët që bëri një revolucion në media dhe që ka dhënë një kontribut të jashtëzakonshëm në zhvillimin e saj. Bashkëpunëtorët dhe kolegët e tij, sot e kujtojnë në ditët e tij më të bukura, kur energjia dukej se nuk shteronte për të. Të gjithë e konsiderojnë si njeriun me superfuqi njerëzore dhe këtë përvjetor duan t’i premtojnë se ëndrra e tij vazhdon. /revistawho.com
