Duket se kupa e “Dancing With The Stars” është e kërkuar nga të gjithë konkurrentët e këtij viti. Në dallim nga edicionet e kaluara ku pretendentë kanë qenë vetëm dy ose tre emra, këtë vit të gjashtë finalistët po luftojnë fort për trofeun e madh. Dhe ‘lufta’ nga pista e kërcimit është zhvendosur në rrjetet sociale, ku personazhe të rëndësishme të jetës publike, miq e të afërt të konkurrentëve VIP po lobojnë për të fituar i preferuari i tyre. I pari që e nisi këtë fushatë ishte Florian Agalliu, duke bërë pjesë të saj emra të njohur të ekranit e teatrit si: Xhemi Shehu, Anjeza Maja, Ajola Xoxa, Ervin Bejleri, Besmir Bitraku, Helidon Fino, etj… Pas tij u angazhuan në këtë mision edhe konkurrentët e tjerë. Ambra Meda siguroi mbështetjen e Erion Veliaj, Emina Çunmulaj, Rozana Radi, Sonila Meço, Ergys Kaçe, Bekim Balaj, etj. Beatrix Ramosaj ka pas vetes gjithë personazhet e famshëm të familjes së saj si: Albërie Hadërgjonaj, Anxhelina Hadërgjonaj, Argjentina Ramosaj, por edhe emrat e njohur të kolegëve të saj në muzikë si: Xhensila Myrtezai, Gold Ag, Rozana Radi, Real One, etj. Aurela Gaçe, ka mbështetur tre prej konkurrentëve të kësaj gare: Beatrix, Ambra dhe Young Zerka, i cili ka gjithashtu përkrahjen e disa prej konkurrentëve të këtij viti që nuk e prekën dot finalen (Niko Komani, Adrola Dushi, Albatros Rexhaj). Nuk qëndrojnë pas në këtë listë as Rovena Dilo dhe Dorina Mema, të cilat janë angazhuar maksimalisht në promovimin e numrave të tyre të votimit.
