Aktori i njohur turk Halit Ergenç, që u bë i famshëm për publikun shqiptar si “Sulejmani i Madhërishëm”, është dënuar me burg me kusht nga një gjykatë në Stamboll. Vendimi erdhi pas akuzave se ai kishte dhënë dëshmi të rreme në lidhje me protestat e parkut Gezi të vitit 2013. Aktori u shpall fajtor dhe u dënua me 1 vit, 10 muaj e 15 ditë burg për veprat “përpjekje për përmbysje të qeverisë” dhe “pengim të funksioneve shtetërore”, akuza që ai i ka mohuar plotësisht.
Gjykimi kishte nisur pas arrestimit të agjentes Ayse Barim në janar, e cila dyshohet për rolin e saj në organizimin e protestave. Sipas hetimeve, ajo u kishte sugjeruar disa nga klientët e saj, përfshirë Ergençin dhe aktorin Riza Kocaoglu, që të mbështesnin publikisht protestuesit.
Gjatë dëshmisë së tij, Halit Ergenç tha se nuk kishte pasur kontakte me organizatorët e protestës, por prokuroria paraqiti prova kundër tij, përfshirë pamje filmike ku ai shfaqej duke marrë pjesë në protestat.
Edhe Riza Kocaoglu u dënua me 1 vit e 8 muaj burg me kusht. Por gjykata vendosi të shtyjë shpalljen e vendimit, duke i lënë të dy aktorët të lirë për aq kohë sa nuk kryejnë vepra të tjera penale në të ardhmen.
Halit Ergenç, i njohur edhe për rolin në serialin “Një mijë e një netë”, mbetet një nga emrat më të dashur të televizionit turk dhe lajmi për dënimin e tij ka shkaktuar reagime të shumta në rrjetet sociale.
Protestat e Gezi-t shpërthyen në maj të vitit 2013 si një reagim qytetar ndaj planeve për shkatërrimin e një parku në qendër të Stambollit për të ndërtuar një qendër tregtare. Shpejt, ato morën përmasa kombëtare si një lëvizje kundër autoritarizmit të qeverisë së atëhershme të udhëhequr nga Rexhep Tajip Erdogan. Protestat u karakterizuan nga përplasje të ashpra me policinë dhe kritikë të forta ndërkombëtare për shkelje të të drejtave të njeriut.
