Prej disa javësh, dedikimet e Besit në rrjetet sociale kishin ngjallur kureshtje dhe shumë spekulime. Tashmë, gjithçka është bërë më e qartë: pas lumturisë së aktorit fshihet dashuria.
Gjatë një koncerti të mbajtur së fundmi, Besi vendosi t’u japë fund pikëpyetjeve të ndjekësve dhe zbuloi publikisht personin të cilit i kushtohet tatuazhi i tij më i fundit. Përballë publikut, ai ndau një moment tepër emocional që u kthye menjëherë në një deklaratë të hapur dashurie.
“Jini falënderues Zotit në ditët tuaja më të mira dhe në ditët tuaja më të errëta. Unë gjithë jetën time kam bërë publikun të qeshë, por kishte vite që më kishte humbur buzëqeshja. Meqë më keni pyetur aq shumë për tatuazhin, dua të falënderoj Zotin që më solli pranë dikë që ma riktheu buzëqeshjen. Ejona, të dua!”
Pas këtij rrëfimi, mesazhi ishte i qartë. Ejona është emri që i ka rikthyer buzëqeshjen aktorit, duke e bërë atë të shfaqet më i lumtur se kurrë.
Në fakt, gjithçka nisi pak javë më parë, kur Besi publikoi në Instagram një foto të një tatuazhi misterioz, ku dallohej emri i një gruaje dhe një datë, e shoqëruar me një këngë romantike. Postimi nxiti reagime të shumta dhe aludime, të cilat tashmë kanë marrë përgjigjen e tyre.
